Пчеларот поради кого збеснаа колегите од нашиот јужен сосед

Македонскиот пчелар, чија фотографија се појави во повеќе медиуми на нашиот јужен сосед, освен дел од тамошните пчелари, успеа сериозно да изнервира и дел од грчката јавност. На фотографијата пчеларот прикажувајќи рамка со легло, стои пред кошници на кои се насликани ликот на Александар Македонски и сонцето од Кутлеш, главната причина поради која во моментов е и „популарен“ кај нашите соседи.

Во текстот посветен на оваа фотографија, насловен како „Скопјаните и нивните простачки работи“, полн со навреди, вулгарности, омраза и бес кон Македонците, а објавен во повеќе грчки медиуми, се вели дека во време кога Грците се нарекувани фашисти од сите страни, „Скопјаните“ подло, но сеуште со надеж, се обидуваат да се претстават како Македонци. Се оди дотаму што како доказ за потеклото, на македонскиот пчелар и на сите кои се нарекуваат Македонци им се нуди анализа и споредба на нивната ДНК со онаа на античките Македонци.

Пчеларите, од каде и да се, важат за благородни, чесни и добри луѓе, и тие како и пчелите не познаваат ниту политика, ниту граници, па затоа ова ќе го прифатиме како нивен мал испад во моментите на слабост и како рефлексија на целокупната ситуација во која се наоѓаат во моментов. А нашиот колега очигледно е дека одлично си ја работи својата работа. Матицата му е за пофалба. Дали сите матици се така квалитетни или само оние од кошниците насликани со македонски мотиви, засега останува мистерија.