Категорија: Вести

[dropcap]С[/dropcap]о цел да се соберат повеќе информации за зимските загуби на пчелни семејства од што повеќе држави, Здружението за превенција на загубите на пчелни семејства, COLOSS (Prevention of honey bee COlony LOSSes), го објави прашалникот за зимски загуби на пчелни семејства 2019/2020, со кој преку одговорите на стандардизираните и унифицирани прашања за пчеларите низ цела Европа треба да се откријат ризиците и факторите за зимските загуби на пчелните семејства. Покрај ова, обработката на податоците треба да обезбеди информации за годишните загуби на национално ниво, како и споредба на бројот на угинати семејства помеѓу државите учесници во анкетата.

Координатор и реализатор на овој проект за територијата на Македонија е Факултетот за земјоделски науки и храна од Скопје, кој со поддршка од Македонското здружение за заштита на автохтоната македонска медоносна пчела (Apis mellifera macedonica) – MacBee, ги спроведуваат сите неопходни активности за успешна реализација на анкетните прашалници.

COLOSS прашалникот за зимските загуби на пчелни семејства 2019/2020 можете да го погледнете и пополните овде .

[dropcap]М[/dropcap]акедонско здружение за заштита на македонската автохтона медоносна пчела (Apis mellifera macedonica) го најавува настанот  „Пчеларски ден – знаење и дружење 2019“. Настанот кој MacBee веќе традиционално го организира неколку години наназад и овојпат ќе биде од едукативно – информативен и меѓународен карактер со учество на странски експерт од областа на пчеларството и со домашни стручни предавачи. Главен презентер ќе биде гостинот од Германија, Мартин Габел. Мартин Габел е германски научен и стручен соработник од областа на пчеларството и пчелар практичар. Во моментов е постдипломец на студии по биологија на Универзитетот Јустус – Либиг во Гисен. Додипломски студии завршил во 2016 година на Универзитетот Филипс во Марбург на отсекот биологија. Дипломирал на темата „Прекин и отстранување на легло како методи за третирање на медоносните пчели против вароа“. Во моментов работи на магистерскиот труд со наслов „Физиологија на однесувањето и поделба на трудот кај пчелите излетнички од шест различни подвидови на медоносната пчела“. Вработен е на одделот за обука и поддршка на пчеларите во Институтот за пчеларство во Кирхајн, а на истиот институт има и статус на привремен истражувач. Ангажиран е и како стручен соработник во проект групата „Био-Ресурс“ на Фраунхофер Институтот за молекуларна биологија и применета екологија во Гисен. Од неговата богата збирка на научни трудови, публикации, презентации и останати авторски и ко-авторски дела, можат да се издвојат:

• „Алтернативен летен третман на медоносната пчела (Apis mellifera L.) против вароа (Varroa destructor Anderson & Trueman)“, предавање на 63-иот годишен состанок на Здружение на Институти за истражување на пчелите, Брауншвајг, Германија, 2016;
• „Метод на летно прекинување на леглото за здрави пчелни семејства, резултати и искуства од истражувањето во Германија“, предавање на Работилницата на COLOSS за контрола на Вароа, Уније, Хрватска, 2016;
• „Алтернативни методи на третман против вароа кај медоносните пчели“, постер-презентација на 46-от Годишен состанок на Друштвото за екологија, Марбург, Германија, 2016;
• „Справување со вароата на природен начин“, серија флаери објавени од државната агенција за земјоделство, Хесен, Германија, 2017;
• „Водич за практична и ефикасна биотехничка контрола на вароата“, постер-презентација на 64-от Годишен состанок наЗдружението на Институти заистражување на пчелите, Цеље, Словенија, 2017;
• „Биотехнички пристап за контрола на вароата преку методите на прекин на леглото, отстранување на леглото и блокирање на леглото во пчелното семејство“, предавање на 45-от меѓународен пчеларски конгрес на АПИМОНДИЈА, Истанбул, Турција, 2017;
• „Третман против вароа со методот на прекин на леглото. Зошто и како?“ Web-семинар за Данското здружение на пчелари, 2018;
• Повеќе авторски и ко-авторски текстови во неколку германски магазини и пчеларски списанија („Зима без третман“ (2018) и „Биотехнички методи на третирање преку сезоната“ (2018), објавени во „Deutsches Bienenjournal“), „Истражувањата на прекин на леглото кај пчелите одат во наредна фаза“ (2017), „Резултатите од испитувањето со прекин на леглото кај пчелите се оптимистички“ (2017), објавени во „Мach mal pause“).

Темата на која ќе презентира дипломираниот биолог Мартин Габел ќе биде: „Прекин и отстранување на легло како методи за третирање на медоносните пчели против вароа“.

Настанот ќе се одржи на 27 јануари 2018 година, на Факултетот за земјоделски науки и храна во Скопје.

MacBee наскоро ќе го објави и официјалниот флаер со програмата на настанот и сите останати информации и детали.

Извор: macbee.org

[dropcap]З[/dropcap]а успешно пчеларење покрај усовршената технологија на пчеларење, потребна е и добра пчелна паша. Задача и цел на секој пчелар е да го зголемува бројот на медоносни билки во регионот каде што пчелари и со тоа да ги подобрува пашните услови и значително да придонесе за зголемување на изворите со нектар и полен за пчелните семејства.

Во таа насока, градинарскиот центар Фоја на сите пчелари по најповолни цени им нуди садници од следните медоносни билки:

• Багрем (Robinia pseudoacacia);
• Лаванда (Lavandula angustifolia);
• Барбула (Caryopteris од видот Summer Sorbet).

Повеќе на флаерот на градинарски центар Фоја

[dropcap]М[/dropcap]акедонското здружение за заштита на македонската автохтона медоносна пчела (Apis mellifera macedonica) – MacBee, со задоволство Ви го претставува настанот „Пчеларски ден – знаење и дружење 2018“. Настанот ќе понуди повеќечасовна програма која вклучува презентации од информативен и едукативен карактер. MacBee веќе неколку години организира настани од ваков карактер, каде на едно место се собрани ценети домашни и странски научни експерти од областа на пчеларството, професионални пчелари и пчеларски ентузијасти и вљубеници во пчеларството. Како и претходните, така и овој настан претставува одлична можност за надградба на Вашето пчеларско знаење, а воедно и да се информирате со активностите на MacBee.

Настанот ќе се одржи на 28 јануари 2018 година, со почеток во 10 часот, во просториите на Факултетот за земјоделски науки и храна – Скопје.

MacBee со особена чест ги поканува сите вљубеници во пчеларството со своето присуство да го збогатат овој настан.

Комплетната програма на настанот „Пчеларски ден – знаење и дружење 2018“, како и начинот на пријавување на учеството, погледнете ги во флаерот – соопштение за флаерот – соопштение за „Пчеларски ден-знаење и дружење 2018“.

Извор: www.macbee.org

[dropcap]З[/dropcap]адоволство кое ќе ве научи што е вистински мед, како се произведува и каде можете да го купите, е накратко идејата на апитуризмот за чиe развивање се залагаат македонските пчелари.

Тие порано велеа – „вистинскиот мед брзо кристализира, по тоа ќе го препознаете“. Но, денес предупредуваат дека веќе и фалсификуваниот ја има сосема истата особина. Толку е изверзирано неговото производство, што потрошувачите во никој случај не можат да направат разлика, ниту да забележат дека купуваат тегла полна гликозен сируп, освен ако не консултираат експерт.

Од една страна, тие се измамени, а од друга, се создава нелојална конкуренција која практично ги уништува сертифицираните, вистински производители.

– Во Македонија има многу квалитетни производители. Тие треба да имаат шанса да дојдат поблиску до своите купувачи, кои, пак, имаат право да знаат што консумираат, вели Нацо Јовчевски, пчелар од битолско Дихово.

Според него, пазарот е полн со фалсификувани пчелни производи.

– Органските производители кои поседуваат сертификати за квалитет на медот се неконкурентни на пазарот, бидејќи фалсификаторите го нудат лажниот мед по многу ниски цени. Наместо корисни состојки, лажниот мед содржи само шеќер и нема никакви лековити својства. Сметаме дека нашите производи не се доволно заштитени од измами, нагласува Јовчевски.

Тој порачува, мед да се купува само од проверени производители кои пчелините семејства ги чуваат во чиста околина и не користат додатоци во нивната исхрана, а не од зелените пазари или по патиштата.

– Македонија треба да развива апитуризам, нешто што западните земји го негуваат подолго време. Преку апитуризмот, купувачите ќе се едуцираат каде да најдат вистински и квалитетен мед. Нашите села се идеални за рурален туризам, подвлекува Јовчевски кој се подготвува да почне туристички тури во неговиот пчеларник во Дихово и да го воведе словенечкото искуство – пчеларниците лоцирани во најчистите предели да бидат дел и од медицински туристички тури, за болни од астма.

Јовчевски има 150 пчелни семејства, а производството на мед, матичен млеч и полен веќе прераснал во фамилијарен бизнис. – Сепак е потребна поголема промоција, по примерот на многу од државите каде се развива апитуризмот. Сите кои ја сакаат природата да можат да дојдат во пчеларникот, да посетат работилници, да дегустираат вистински мед, да научат за производството, а ако сакаат и да учествуваат во дел од процесот, потенцира Јовчевски.

Произведува два до три тони мед годишно, но не може да извезува бидејќи се бараат најмалку над 20 тони. Ако се надмине проблемот со фалсификаторите на мед, пчеларството, вели, може да биде многу профитабилна дејност. За таа цел треба да се форсираат земјоделските задруги, бидејќи здружени, пчеларите ќе бидат поконкурентни на пазарот, а ќе можат да обезбедат и доволни количини за извоз.

– Пчеларството е добар бизнис за младите, може да се живее и да се заработи, но најважно е да се стави крај на нелојалната конкуренција. Најважно е што пчеларите секој ден се во природа, зашто пчели се одгледуваат во најчистите предели. Пчеларењето и консумацијата на чист мед го подобруваат здравјето, заклучува Јовчевски.

Јовчевски е член на Здружението за заштита на македонската медоносна пчела и член на президиумот „Макби“ поддржан од Слоу фуд.

Извор: TV Nova

Фотографии: Facebook.com/BeekeepingBN

[dropcap]В[/dropcap]родија плод преговорите на пчеларите со ресорното министерство. Во иднина пчеларите ќе може да ја користат Националната програма за рурален развој за набавка на опрема, сандаци и сл. Исто така има најава за намалување на ДДВ – то при набавка на потребна опрема за пчеларење.

Набавка на пчеларски машини, центрифуги и останата опрема потребна за пчеларење пчеларите ќе може да набавуваат преку Националната програма за рурален развој или позната кај земјоделците како програмата 50 : 50. Прифатени се барањата на пчеларите да може да ја користат оваа програма. За многу пчелари проблем беа  високите граници за парични средства во ИПАРД програмата, со кои требаа сами да учествуваат, што не е случај во Националната програма, изјави за ТВ Орбис Менде Трајковски, пчелар од Битола, а кој од скоро е и претседател на Сојузот на пчелари на Македонија.

Од Сојузот велат дека се во преговори за намалување на ДДВ – то при набавка на опрема за пчеларење исто како и кај останатата земјоделска опрема од 18% на 5%. Како што информира Трајковски и за ова има позитивна најава.

https://www.youtube.com/watch?v=yxQGADGDhdY

Извор: ТВ Орбис

[dropcap]И[/dropcap]ницијативниот Одбор за основање на Пчеларска Федерација на Македонија, најави дека на 26 декември 2015 година, во 11:00 часот во просториите на Факултетот за земјоделски науки и храна – Скопје, ќе го одржи Основачкото Собрание на новиот пчеларски субјект во Република Македонија. Иницијативниот одбор го сочинуваат повеќе пчеларски здруженија од целата држава кои функционираат на локално ниво.

Одборот за основање ги поканува сите здруженија кои тежнеат да го подобрат македонското пчеларство да пријават свое учество преку свои делегати и на тој начин да ја поддржат новата федерација.

На Основачкото собрание ќе бидат дефинирани целите на федерацијата, предвидено е да биде донесен Статутот на федерацијата и да се изберат претседателот и управувачките органи на Пчеларската Федерација на Македонија.

[dropcap]М[/dropcap]акедонското здружение за заштита на македонската автохтона медоносна пчела – MacBee, ги поканува сите заинтересирани да го посетат  настанот „Пчеларски ден – знаење и дружење“.  Настанот кој е во организација на MacBee, освен едукативниот карактер, ќе биде и можност здружението MacBee транспарентно да ги запознае македонските пчелари со своите активности.

Настанот ќе се одржи на 20 декември 2015 година, со почеток во 10 часот, во просториите на Факултетот за земјоделски науки и храна – Скопје.

Централна тема на „Пчеларски ден – знаење и дружење“ ќе биде предавањато на проф. д-р Никола Кезиќ, посветено на болестите на пчелите и практичното пчеларство. Проф. д-р Кезиќ, долгогодишен професор на Земјоделскиот факултет во Загреб, Хрватска, кој важи за еден од најреномираните научни работници во пчеларството на Балканот и во Европа, со сигурност ќе го задржи вниманието на посетителите на настанот.

Комплетната програма на „Пчеларски ден – знаење и дружење“, како и начинот на пријавување на учеството, погледнете ги во флаерот – соопштение за „Пчеларски ден – знаење и дружење“.

Превземено од www.macbee.org