На 14-ти февруари, секаде во православниот свет, а особено на Балканот, се чествува денот посветен на светиот маченик Трифун. Меѓу народот овој светец е сметан за заштитник првенствено на насадите со винова лоза, но и на сите останати овошни насади, па и на сите посеви и засадени земјоделски култури. Пчеларите го слават токму како заштитник на овошките, кои спаѓаат меѓу најбитната пчелна паша. Постои верување дека ако Св. Трифун добро се погрижи и ги заштити овошните дрвца од болести и невреме, освен што пчелите ќе имаат добра паша, тие ќе се погрижат дрвцата да бидат добро опрашени, со што би се добиле многубројни здрави плодови. Се верува дека светецот ги штити посевите и имотите од поплави, суши, волци, глувци, скакулци и разни други животни и непогоди. Лозарите и овоштарите на овој ден симболично ги закројуваат своите насади и посипуваат со вино неколку корења од насадите, сметајќи дека виното ќе им ја поврати силата на корењата изгубена за време на студената зима и тие ќе станат повитални и подготвени за новата сезона во која ќе дадат богат род. Според народните верувања, ако на овој ден паѓа снег или дожд, годината ќе биде родна, а ако е ведро и сончево, годината ќе биде сушна и неродна.
Категорија: Вести
-
Пчеларите од Малта под закана на Aetina tumida?
[dropcap]П[/dropcap]челарите од Малта се соочуваат со сериозен проблем во последниве неколку недели. Откако сопственикот на една италијанска компанија која се занимава со одгледување на матици, на еден од островите од малтешкиот архипелаг поставил околу 450 пчелни семејства, пчеларите се видно загрижени поради можната опасност од инвазија на малата кошничка бубачка во малтешките пчеларници.
Ермано Де Чино, сопственикот на „Мелита Бис Лимитед“, на островот Гозо поставил 455 кошници со пчели кои ќе му служат за производство на матици за извоз. Според сопственикот, климатските услови кои ги нуди Малта се идеални за производство на матици, што е одлично за неговиот бизнис. Тој вели дека неговите кошници не се донесени од Сицилија и јужна Италија, каде постои заразеност со малата кошничка бубачка, туку се донесени од неговите пчеларници во северна Франција. Но пчеларите од Малта не му веруваат на Де Чино и тврдат дека неговите пчели се токму од регионите каде владее заразеноста со бубачката и дека на овој начин тој се обидува да ги спаси своите пчелни семејства. Неговата фирма е основана пред неколку месеци, токму кога на југот во Италија започна да се шири заразата со малата бубачка. Тие сметаат дека шарите и ознаките на донесените кошници се исти како оние кои пред некое време биле забележани на еден од неговите пчеларници во Италија, а камионите со кои кошниците се донесени до југот на Италија, а потоа на еден од малтешките острови, се премногу стари и не би можеле да извозат толкав голем пат од северот на Франција до јужна Италија. Дополнително пчеларите бараат и проверка на патните налози на возилата и товарот, но сопственикот на компанијата не им го дозволува тоа. Велат дека и товарот, односно кошниците, не биле соодветно заштитени како што според прописите би требало да бидат заштитени кошниците превезувани при толку долг пат. Бидејќи Европската Комисија воведе забрана за извоз и движење на пчелни семејства надвор од Италија, пчеларите од Малта сметаат дека ова е сериозен прекршок.
Претседателот на пчеларскиот сојуз на Малта, Стефан Галеа вели дека доколку само една возрасна единка на малата кошничка бубачка или неколку нејзини ларви бидат внесени на територијата на Малта, тоа за оваа мала островска држава би имало катастрофални последици, не само по пчеларството, туку и по голем дел од растителниот свет, земјоделството и целата економија. Тој смета дека освен опасноста од зараза, донесените пчели од Италија сериозно ќе влијаат и ќе ја нарушат автохтоноста на малтешката автохтона пчела Apis mellifera ruttneri, која со вкрстување на увезените пчели би загубила дел од своите карактеристики кои се од големо значење за локалните пчелари.
Од граничната полиција на Малта велат дека при контролата на траектот, сите документи биле во ред, но пчеларите велат дека ниедна кошница не била физички проверена. Пчеларите не ја сметаат за веродостојна и изјавата на домашните ветеринарни власти, во која се вели дека сите кошници биле чисти од било какви болести. Најавуваат дека сериозно ќе ја следат ситуацијата, а освен поттикнатата дебата во парламентот на Малта, претседателот на пчеларите, Стефан Галеа, најавува и заминување во Брисел, каде во дирекцијата за земјоделство на ЕУ ќе ја образложи заканата од малата кошничка бубачка и потенцијалната закана за хибридизација на малтешката автохтона пчела, опасности кои во неговата држава освен пчеларите, никој друг не ги смета за сериозни.
-
Повисоки субвенции за регистрираните пчеларски одгледувалишта благодарение на MacBee
[dropcap]Р[/dropcap]егистрираните пчеларски одгледувалишта кои одгледуваат и продаваат сертифицирани и селекционирани матици и пчелни роеви од подвидот Apis mellifera macedonica, во 2015 година освен редовните 600 денари, ќе добиваат и дополнителни 1000 денари по пчелно семејство. На иницијатива на кластерот MacBee,во кој членуваат дел од засегнатите субјекти, во 2014 година беа одржани низа средби со Министерството за земјоделство, шумарство и водостопанство, Министерството за економија и неколку владини агенции, при што истите беа запознаени со проблемите со кои се соочува кластерот MacBee и беа понудени конкретни решенија за тие проблеми. Меѓу предложените решенија беше и забелешката во рамките на Програмата за финансиска поддршка во земјоделството да се оформи мерка за финансиска поддршка на регистрирани одгледувалишта на пчелни матици во висина од 1000 денари по пчелно семејство опфатено со одгледувачка програма и програма за селекција. Ваквиот предлог беше врз основа на лошата состојба во која се наоѓаа регистрираните пчеларски репроцентри и која поради отежнатото работење можеше да доведе до нивно згаснување, а на тој начин да се нанесе голема штета на генетскиот фонд на нашата домашна автохтона медоносна пчела. На средбите беа понудени и уште неколку решенија, кои освен за самиот кластер, беа од значење и за сите домашни пчелари.
Здружението MacBee и пчеларскиот кластер MacBee ќе продолжат со ваквите активности и иницијативи со цел да ги заштитат и унапредат правата на своите членови и да придонесат за развој на домашното пчеларство.
Извор: www.macbee.org
-
Aethina tumida досега уништи над 3600 пчелни семејства во Италија
[dropcap]Д[/dropcap]о 11-ти декември 2014 година, поради заразеност со малата кошничка бубачка, на околу 60 пчеларници запалени и уништени се повеќе од 3600 пчелни семејства со што е направена штета процената на околу 1,5 милиони евра. Со овој радикален и непопуларен потег на италијанските власти не се сложуваат италијанските пчелари, кои револтирани сметаат дека само преку заедничка стратегија, а не со палење на пчелните семејства може да се дојде до решение на настанатата ситуација. Според пчеларите, бесплатните стапици за ловење на бубачката, во комбинација со соодветен хемиски третман и деконтаминирање на почвата околу пчеларникот, би резултирало со намалување и елиминирање на заразата. Револтот го зголеми и непостоечката одлука за обесштетување на уништените семејства, па пчеларите беа оставени сами на себе. Дури во последните денови од 2014 година, беше донесена одлука со која на пчеларите ќе им се исплаќа одреден надоместок за уништените семејства, почнувајќи од 80 до 120 евра за уништен нуклеус па нагоре.
Мерката за палење на семејствата во кои ќе се најде барем една возрасна единка на малата кошничка бубачка ќе се спроведува до пролет, од кога би требало да се настапи со нова стратегија за борба против овој штетник.
-
Осма едукативна средба на членовите на ПЗ „Матица“-Скопје
[dropcap]Н[/dropcap]а 25/12/2014 година, во просториите на Сојузот на Стопански комори во Скопје, ќе се одржи осмата по ред средба на членовите на ПЗ „Матица“-Скопје.
Во едукативниот дел од средбата, со своја презентација ќе настапи Драги Спасенцовски, искусен пчелар од Скопје, кој ќе ги претстави начините и техниките на пчеларење и производство на матици на својот пчеларник.
Дел од средбата ќе биде наменет и за предлогот на големиот број на членови на здружението-измена на денот на одржувањето на едукативните состаноци.
-
Успешно презентирани пчеларски трудови на Студентската смотра
[dropcap]„В[/dropcap]аквите настани се од големо значење, бидејќи преку нив спознаваме со каков капацитет располагаат нашите студенти. За нас, тоа е од особено голем интерес затоа што од ваквите средби и од авторите на ваквите трудови се регрутира идниот потенцијал на факултетот и идните наставно научни работници од областа на земјоделството„-рече денес деканот на Факултетот за земјоделски науки и храна Скопје, Проф. Д-р Драги Димитриевски, во воведното обраќање на отварањето на 6-та Студентска смотра на научни трудови. „На предавачите им посакувам успех на денешнава смотра, а на сите останати ви препорачувам преку конструктивни прашања и дебата да го збогатите и направите уште поинтересен овој настан“-додаде Проф. Д-р Димитриевски. Претседателот на Студентскиот парламент на студентите на ФЗНХ, Бобан Пиперкоски, кој свечено го отвори настанот, ја најави соработката со други македонски универзитети со цел Смотрата да биде поуспешна и изрази желба наредните години таа да добие и меѓународен карактер.
Што се однесува до пчеларските теми, беа претставени три научни трудови.
Јана Павлова преку трудот работен заедно со Мирјана Крстева Апостолов и Мери Жаја, „Влијание на производната серија врз процентот на прифатени ларви и приносот на матичен млеч“, ги анализираше состојбата и факторите кои влијаат на приносите и квалитетот на матичен млеч, во период од една пчеларска сезона, на пчеларник во кумановско.
Мирољуб Голубовски имаше интересна презентација на трудот со наслов „Влијание на квалитетот на консумираната зимска прихрана врз пчелите работнички во лабораториски услови“. Во својот труд, преку експериментално хранење на пчелите со неколку погачи од комерцијално и домашно производство, ги објави резултатите, односно со каков квалитет се погачите кои се наоѓаат во промет во домашните пчеларски продавници и кои се последиците по пчелите со исхрана со дел од нив. Голубовски овој труд го работеше заедно со колегите Мирослав Тасевски и Кристијан Христовски.
Третата презентација се однесуваше на трудот на Благоја Долгоски и Мартин Стојаноски, „Тродимензионален модел на развојот на пчелно семејство во текот на годината“. Во овој труд на интересен начин беше претставено позиционирањето на пчелното семејство во кошницата во неколку месеци од годината и количината на легло по месеци.
Ментори на трудовите од областа на пчеларство беа Проф. Д-р Хрисула Кипријановска и Доц. Д-р Александар Узунов.
*Медно.мк се извинува за лошиот квалитет на фотографиите
-
Пчеларски теми на Студентската смотра на научни трудови
На традиционалната 6-та Студентска смотра на научни трудови, во организација на Студентскиот Парламент и Факултетот за земјоделски науки и храна при Универзитетот „св. Кирил и Методиј“ – Скопје, која ќе се одржи на 15/12/2014 година на Факултетот за земјоделски науки и храна во Скопје, покрај останатите трудови ќе бидат и презентирани неколку трудови од областа на пчеларството. Презентери на трудовите ќе бидат повеќе студенти од ФЗНХ, кои под менторство на Проф. Д-р Хрисула Кипријановска и Доц. Д-р Александар Узунов, работеа на експерименти поврзани со производство на матичен млеч, квалитетот на погачите дадени при зимска прихрана и развојот на пчелните семејства во текот на годината.
Студентската смотра на научни трудови ќе се одржи во амфитеатарот број 39, со почеток во 11.00 часот. Комплетната програма погледнете ја овде.
-
Во Банско одржана бугарско-македонска изложба на мед, пчелни производи и пчеларски инвентар
Од 28/11 до 30/11/2015 година, во Музејскиот комплекс „Никола Јонков Вапцаров“ во Банско, Бугарија, беше одржана бугарско-македонска изложбана мед, пчелни производи и пчеларски инвентар. На изложбата учество земаа повеќе од 30 конвенционални и органски пчелари од двете соседни земји. Во рамки на изложбата имаше и едукативен дел посветен на актуелните случувања во пчеларството, кој беше заокружен со богата дискусија од пчеларите. Изложбата имаше и натпреварувачки карактер, а на победниците им се доделени награди во пчеларска опрема. Дека пчеларите се хумани луѓе покажува и тоа што мед и други пчелни производи се донирани од страна на изложувачите на Заводот за социјални услуги во Банско. На маргините на манифестацијата беше потпишан меморандум помеѓу повеќе здруженија за заедничка соработка во областите на конвенционалното и органското пчеларство.
(blagoevgrad.eu)
-
Малата кошничка бубачка (Aethina tumida) сè повеќе се шири во Италија.
[dropcap]М[/dropcap]алата кошничка бубачка (Aethina tumida), навлегува сè подлабоко на територијата на Италија. Ситуацијата со заразата е сериозно сфатена од сите тамошни надлежни органи и деноноќно се следат сите промени поврзани со овој штетник на пчелните семејства. Овие мерки, кои ги спроведуваат италијанските пчелари и одговорни служби, се од големо значење за целиот регион. Доколку се направи и најмал пропуст и италијанските власти дозволат ширење на бубачката, тоа би било сериозен проблем за европското пчеларство. Поради географската близина и во нашата држава постои сериозна опасност од ширење на заразата.
Мерките, стратегијата и насоките превземени од италијанските власти за спречување на ширење на заразата, а презентирани од Д-р Франко Мутинели од Националната лабораторија за пчеларство при Универзитетот во Венеција, можете да ги погледнете на официјалната страна на Македонското здружение за заштита на македонската автохтона медоносна пчела (Apis mellifera macedonica).
Превземено од macbee.org.
-
Петта средба на членовите на ПЗ „Матица“-Скопје
[dropcap]Н[/dropcap]а 04/12/2014 година, ќе се одржи петтата по ред средба на членовите на ПЗ „Матица“-Скопје. На средбата, по барање на членовите на здружението ќе се ревидира Статутот на здружението со цел да се утврдат одредените неправилности содржани во Статутот. Ќе се разгледа и постоењето и начинот на функционирање на одредени органи на здружението. По барање на членовите, ќе се разгледаат и неколку понудени верзии за избор на лого на здружението.
