Автор: Горан Алексовски

[dropcap]„Г[/dropcap]енерален впечаток е дека изминатата пчеларска сезона во поглед на медоберот е катастрофална“-беа завршните зборови на претседателот на ПЗ „Матица“-Скопје, Павле Бошкоски, по дискусијата од првата точка од дневниот ред, откако  членовите на здружението, на  првата работна средба за сезоната 2014/2015 ги изнесоа своите впечатоци и резултати од медоберот и состојбата со пчелните семејства во изминатава сезона. Членовите на здружението заеднички се сложија дека иако неколку региони од државава се исклучени од катастрофата која ги погоди, оваа сезона е полоша од ланската, а повозрасните и поискусни пчелари изјавија дека не се сеќаваат на толку лоша пчеларска година. Според членовите на ПЗ „Матица“-Скопје, цената на медот ќе оди уште повисоко и моменталната цена од 300 денари за килограм мед, за кратко време ќе биде променета.

Како дел од дневниот ред, на членовите им беше презентирана и Предлог програмата за работа на здружението во сезоната 2014/2015. По долга дискусија, членовите одредија и дадоа приоритети на неколку точки од програмата, а дел од дадените работни предлози беа променети.

Работните состаноци ќе се одржуваат по стариот термин (секој четврток од 17:00 часот). Последниот работен состанок е закажан за 26/03/2015 година.

[dropcap]П[/dropcap]челарство, екологија на растенијата и биодиверзитет во пчеларството ќе бидат главните теми на кои ќе се дискутира од 6-8 ноември во Рим, на вториот по ред Меѓународен симпозиум АпиЕкоФлора и Биодиверзитет, спонзориран од Меѓународната пчеларска асоцијација Апимондија во соработка со Италијанската пчеларска федерација и Универзитетот Тор Вегата од Рим.

На симпозиумот ќе присуствуваат делегати од цел свет, повеќе италијански универзитети ќе ги претстават своите истражувањата од областа на пчеларството, растенијата и биодиверзитетот, а свои презентации ќе имаат и претставници на Светската организација за храна-ФАО и Организацијата за храна и земјоделство при Обединетите нации.

Главната цел на АпиЕкоФлора е да се стимулира и подобри соработката помеѓу истражувачките институции, пчеларите и пчеларските здруженија, фармерите и сите други засегнати страни, со цел да се воведат нови методи и пракси и одржливото пчеларење да се крене на повисоко ниво, бидејќи само стабилно и одржливо пчеларство може да обезбеди квалитет и квантитет во земјоделското производство.

Комплетната програма можете да ја погледнете на официјалната интернет страна на АпиЕкоФлора.

[dropcap]„П[/dropcap]челарењето е доходовен бизнис и приходот од него е добредојден за домашниот буџет. Во Македонија има услови за производство на квалитетен мед, а бидејќи се произведува од македонската автохтона медоносна пчела Apis mellifera macedonica, овој мед е ценет и има посебна вредност. Тоа се докажа и на последниот саем на Слоу Фуд во Торино, каде македонскиот мед освои второ место“-вели Ѓорѓи Андонов, банкар, љубител на пчелите и на природата и член на MacBee, во интервјуто за Канал 5 телевизија.

Подолу погледајте го целото интервју.

http://www.youtube.com/watch?v=y-2uNYej1fA#t=173

Превземено од macbee.org

Студеното време доаѓа, па помеѓу безбројте начини да се загреете, опуштите и заборавите на студот, медно.мк Ви нуди уште еден-рецепт за варено вино со мед.

Потребни состојки:

-750 ml  црвено или црно вино

-вода (шоља наполнета 1/3)

– мед (шоља наполнета 3/4)

-цимет (се става по вкус)

-по желба при варењето можете да ставите и кора и парчиња од портокал, семки од калинка, ванила или неколку зрнца бибер, а кругови лимон при декорирањето.

Во метален сад се ставаат сите состојки и смесата се загрева, сè додека не почне тивко да врие и испарува. Се вари така уште 15-20 минути и се трга од оган. Се става во стаклени шољи или садови по избор, се декорира по желба и се пие во друштво.

Пченката е меѓу најраспространетите и најкорисни житни култури. Наоѓа широка примена во прехранбената индустрија, сточарството и многу други индустриски гранки. Но колку е корисна и за пчелите?

Иако пченката се опрашува со ветар, поради што нема механизам за да делува атрактивно кон пчелите и не лачи нектар, тие од неа можат да соберат значително количество на полен. Причината за собирање на големо количество на полен се крие токму во природата на опрашување и во градбата на прашниците на пченката. Кога пчелите летаат и собират полен низ полето со пченка, поради сечењето на воздухот, влакненцата на нивното тело се наелектризируваат, па испуштените зрнца полен од прашниците, наменети за ветарот, се залепуваат на телото на пчелата. Внесувањето на полен позитивно влијае врз матицата и пчелната заедница, но иако е собран во големо количество, поленот од пченка ја нема ниту минималната протеинска хранлива вредност која им е потребна на пчелите. Нивото на протеини во пченкарниот полен изнесува 14,9%, што е далеку од 20%, минималната протеинска вредност која нутритивно ги задоволува пчелите.

 Зрнца на полен од пченка под електронски микроскоп

Поради оваа причина, не треба да се дозволи главен извор на полен за пчелното семејство да биде пченката. Во спротивно, пчеларот ќе има пчели кои ќе живеат пократко од вообичаено, тешко ќе се справуваат со напорите во текот на медоберот и полесно ќе заболуваат од ноземоза и други инфекции. Добра опција е пчеларот да го собира поленот од пченка, соодветно да го складира и во текот на зимскиот период или рана пролет да го даде повторно на семејството, но измешан со соино брашно.

[dropcap]С[/dropcap]тепенот на заразеност со вароа кај семејствата во еден пчеларник може да варира во текот на една сезона и помеѓу одделни сезони. Доколку пчеларот знае колкав е бројот на крлежи и колку бргу нивната популација се зголемува, толку полесно ќе одреди каква акција да превземе и како да реагира во одреден случај за да го намали степенот на заразеност.

Еден од основните методи за мониторинг на заразеност со вароа е тестот со валкање на пчелите во шеќер во прав. Овој метод не е скап, лесно се изведува на терен, не е штетен по пчелите и со него може приближно да се оцени степенот на заразеност со вароа.

Механизмот на делување на шеќерот во прав се состои во тоа што ситните гранули од шеќер се лепат на стапалките (емподиуми) на крлежот, тој ја губи способноста да се задржи на телото на пчелата и се откачува од нејзиното тело. Постојат и тврдења дека шеќерот ги стимулира пчелите да го чистат своето тело, па така ги истресуваат и крлежите, а според некои шеќерот на ист начин делува и кај крлежите, кои во обидот да се исчистат од ситните шеќерни зрнца се откачуваат од телото на пчелата.

За изведување на оваа контрола потребно е:

• една тегла од 500 грама, со пластично или метално капаче на кое има поставено метална мрежа
• чашка од 100 милилитри (собира приближно 300 пчели)
• шеќер во прав
• бела хартија и
• лажица

(опционално: бела крпа, бела чинија, кофа со вода, лупа).

За овој метод препорачливо е да се земаат пчели од 3 рамки и тоа од средината на семејството, за да има што повеќе млади пчели. Доколку се изведува во месеци кога има малку легло, доволно е да се земат пчели од една рамка. Се внимава да не се стави и матицата. Чашката со пчели се истура во теглата во која претходно има ставено 2 лажици шеќер во прав и теглата се протресува 1-2 минути. Се внимава при тресењето да не се истура шеќерот и сите пчели да бидат извалкани во него. Се остава теглата 2 минути, а потоа повторно се тресе 1-2 минути. Шеќерот се истресува низ мрежата на капачето, а доколку има крлежи ќе испаднат и тие. За да се избројат полесно паднатите крлежи, обично шеќерот се истура на бела хартија, платно, бел сад или во кофа со вода. Теглата со пчели се истресува се додека од неа испаѓаат шеќер и крлежи. Штом се заврши со истресувањето, пчелите се ослободуваат и неповредени се враќаат назад во кошницата. Се бројат паднатите крлежи и според таа бројка се одредува степенот на заразеност (бројот на паднати крлежи се дели со бројот на тестирани пчели) и се прави план за понатамошни активности.

Препорачливо е тестот да се врши два пати годишно. Првиот тест се прави на пролет, за да се утврди состојбата на семејствата пред почеток на активната сезона. Над 3 истресени крлежи во овој период, е индикатор за превземање на одредена акција. На крај од летото се врши вториот тест, во кој ако бидат истресени повеќе од 12 крлежи, се смета дека тоа семејство е сериозно инфицирано и потребен му е одреден анти-вароа третман.

[dropcap]З[/dropcap]а разлика од некои македонски локални самоуправи, кои го ограничуваат, па дури и забрануваат пчеларењето на територијата од својата општина, локалната самоуправа на италијанскиот град Росињано одлучи, дел од својот имот да им го стави на располагање на пчеларите.

Според многумина, ова е голем поттик за оние кои сакаат да се занимаваат со одгледување на пчели. Постепеното исчезнување на пчелите и ефектот од намаленото опрашување врз продукцијата на насадите се препознаени од администрацијата на градот, па со намера да го популаризираат и омасоват пчеларењето, одлучиле да направат еден ваков чекор. „Со оглед на тоа дека на територијата на општината има неискористени парцели, решивме да ги активираме за нешто позитивно“-вели  Даниеле Донати, комесар за земјиште во градот Росињано. „Целта ни е да покренеме иницијатива за развој на пчеларењето, без разлика дали тоа би било рекреативно, комерцијално или експериментално. На тој начин би помогнале и во развојот на градот, подигајќи ги вредностите на локалното земјоделство и квалитетот на животната средина“-додава Донати.

Сопственоста над земјиштето од страна на пчеларите ќе биде од привремен карактер и секој корисник ќе поседува лиценца за неговото користење. Имајќи во предвид дека од 2008 година, пчеларството во Росињано е во лоша состојба поради големата загуба на пчелни семејства, градските власти очекуваат голема заинтересираност и многу апликации.

[dropcap]З[/dropcap]драви пчели без присуство на вароа, е сонот на секој пчелар. Дали откритието на биолозите од Универзитетот во Хохенхајм, Германија, може да го направи овој сон реалност?

Истражувачите, преку манипулирање со сексуалната активност на крлежот, успеале да дојдат до еколошки и лесен начин за намалување и елиминирање на вароата во кошницата. Преку изолирање на женските сексуални феромони, кои ги испуштаат женските единки на вароа, биолозите успеале да го детерминираат составот на сексуалните феромони и истите да ги произведат по синтетички пат.

А токму во феромонската активност на крлежите се кријат механизмот на функционирање и ефектот на овој метод. Ако феромонска активна материја се напрска по саќето со легло, таа ќе предизвика иритација врз машките единки, поради што тие губат ориентација во однос на времето за парење, стануваат помалку сексуално активни и им се намалува репродуктивната способност. Овој феромонски сексуален дисбаланс предизвикува женските единки да бидат спарувани и оплодени во погрешно време, кога сеуште не се сексуално зрели. Ваквите единки се помалку витални, не можат да произведуваат женски јајца, па поради тоа не можат со својот репродуктивен циклус да придонесат во зголемување на бројот на популацијата на вароа. При паралелно испитување на семејства каде е аплицирана феромонската материја и семејства без ваков третман, забележано е намалување на сексуалната активност на женските единки за 60%.

Истражувачите велат дека овој третман е евтин, нештетен по околината и човекот и лесно се спроведува на терен. Методот е во фаза на патентирање, процес по кој би требало да следи негова комерцијализација, кога би ги дознале и условите за аплицирање и дозирање на третманот.

[dropcap]Б[/dropcap]угарски пронаоѓач развил програма, која може да стане револуционерна за модерното пчеларење. „Програмата за паметно менаџирање со кошницата“ е компјутерски софтвер кој врши мониторинг врз состојбата во кошницата, здравјето на пчелите и го алармира пчеларот за секоја непожелна промена во пчелното семејство. Проектот на Борислав Лазаров, за паметно менаџирање на пчеларникот е базиран на два сегменти: хардвер, кој е сместен во кошницата и софтвер задолжен за собирање на податоците, анализирање и испраќање до пчеларот.

Според Лазаров, оваа иновативна технологија, на пчеларот му нуди многу можности и иако проектот е во фаза на развој, му претстои добра иднина. Без отварање на кошницата и со што помалку стрес за пчелите, во реално време преку интернет врска, пчеларот може да добие точни податоци за состојбата на семејството, контаминираноста на медот, роевиот нагон и др.

[dropcap]44[/dropcap]-тиот по ред Меѓународен Пчеларски Конгрес Апимондија ќе се одржи во Теџон, Јужна Кореја, од 15 до 20 септември 2015 година. Темата на овој Конгрес ќе биде „Пчелата го сплотува светот“.

Според Кјунхван ЈО, претседател на Организациониот одбор на 44-тиот конгрес на Апимондија, се очекуваат над 10000 учесници и посетители од 130 земји, кои ќе предаваат, дебатираат и превземат акции за промовирање заедништво и соработка во областа на пчеларството.

Освен откривање на тајните на пчеларството, Апимондија нуди и можност за откривање на богатата култура на земјите во кои се одржува. Теџон, според Кјунхван ЈО, не е избран случајно за домаќин на најголемата меѓународна пчеларска манифестација. Тој вели дека токму во овој град се сплотуваат и коегзистираат традицијата и модерната наука и дека во овој град посетителите на Апимондија 2015 ќе доживеат едно многу поинакво и досега невидено искуство.

Организациониот одбор на Апимондија 2015 сеуште не ја објави официјалната програма, но во јавност ги изнесе сесиите од кои ќе биде составена програмата:

• Апитерапија
• Биологија на пчелите
• Пчеларството и руралниот развој
• Економија во пчеларството
• Опрашувањето и корисна флора во пчеларењето
• Здравствена состојба на пчелите
• Технологии на пчеларење и квалитет