Ознака: MacBee

[dropcap]М[/dropcap]акедонското здружение за заштита на автохтоната македонска медоносна пчела (Apis mellifera macedonica) го најавува настанот „Пчеларски ден – знаење и дружење 2020“. Настанот, кој MacBee веќе традиционално го организира неколку години наназад и овојпат ќе биде од едукативно – информативен и меѓународен карактер со учество на странски експерт од областа на пчеларството и со домашни стручни предавачи. Главен презентер ќе биде гостинот од Австрија, г-ца Ана Пернер, професионален пчелар. Г-ца Пернер има долгогодишно искуство на пчеларење на семејната пчеларска фарма, која е една од најголемите производители на пчелни матици во Австрија. Таа е ангажирана и како секретар во Австриското здружение на одгледувачи на Крањска пчела (ACA). Темата на која ќе презентира г-ца Пернер е „Наш начин на пчеларење“.

Настанот ќе се одржи на 15 декември 2019 година, во просториите на Факултетот за земјоделски науки и храна во Скопје, со почеток во 10:00 часот.

Овде можете да го превземете официјалниот флаер за настанот.

Извор: FB профил на MacBee

[dropcap]Н[/dropcap]а 25-ти мај 2015 година, гостин на пчеларникот во с. Малино и дел од репро-центарот за пчелни матици „ЕКО ПЧЕЛА“-Скопје, беше новинарот Зоран Трајчевски, кој за потребите на својата емисија „Актуелно“, која се емитува на Македонското радио, направи интервју со сопственикот на одгледувалиштето, професионалниот пчелар Борче Павлов. Новинарот, истовремено голем вљубеник во природата и почетник во пчеларењето, се запозна со капацитетите на одгледувалиштето, условите за работа и начинот на функционирање на овој бизнис. Присуствуваше на рутински преглед на дел од кошниците од типот Родна Воја.

Беше посетен и експерименталниот пчеларник на здружението „MacBee“ лоциран недалеку од репро-центарот, каде дел од членовите на здружението го запознаа новинарот со активностите и дел од проектите на здружението.

Како благодарност за успешно реализираниот пчеларски ден, Трајчевски на двете здруженија им се оддолжи со интересно видео во негова лична продукција:

[dropcap]Р[/dropcap]егистрираните пчеларски одгледувалишта кои одгледуваат и продаваат сертифицирани и селекционирани матици и пчелни роеви од подвидот Apis mellifera macedonica, во 2015 година освен редовните 600 денари, ќе добиваат и дополнителни 1000 денари по пчелно семејство. На иницијатива на кластерот MacBee,во кој членуваат дел од засегнатите субјекти, во 2014 година беа одржани низа средби со Министерството за земјоделство, шумарство и водостопанство, Министерството за економија и неколку владини агенции, при што истите беа запознаени со проблемите со кои се соочува кластерот MacBee и беа понудени конкретни решенија за тие проблеми. Меѓу предложените решенија беше и забелешката  во рамките на Програмата за финансиска поддршка во земјоделството да се оформи мерка за финансиска поддршка на регистрирани одгледувалишта на пчелни матици во висина од 1000 денари по пчелно семејство опфатено со одгледувачка програма и програма за селекција. Ваквиот предлог беше врз основа на лошата состојба во која се наоѓаа регистрираните пчеларски репроцентри и која поради отежнатото работење можеше да доведе до нивно згаснување, а на тој начин да се нанесе голема штета на генетскиот фонд на нашата домашна автохтона медоносна пчела. На средбите беа понудени и уште неколку решенија, кои освен за самиот кластер, беа од значење и за сите домашни пчелари. 

Здружението MacBee и пчеларскиот кластер MacBee ќе продолжат со ваквите активности и иницијативи со цел да ги заштитат и унапредат правата на своите членови и да придонесат за развој на домашното пчеларство.

Извор: www.macbee.org