Категорија: Uncategorized

[dropcap]П[/dropcap]онекогаш, поради најразлични фактори, планираниот и правилен развој на семејствата не оди како што посакува пчеларот. Периодот на главна пчелна паша се наближува, а пчеларот се соочува со сериозен проблем. Во вакви ситуации се чини дека спасот е во стимулација на матицата и поттик за нејзино интензивно несење. Медно.мк Ви претставува еден стимулативен рецепт-еликсир за матицата, кој ќе помогне во „будењето“ на нејзините јајници.

Во 4 литри вода и два килограми шеќер, се цедат два лимони и смесата се загрева колку да се растопи шеќерот. Кога ќе се олади, во сирупот се додаваат 3 белки од јајца и смесата убаво се меша. 500 милилитри сируп се дава на 4 дена на семејството чија матица се стимулира.

Голема улога во овој сируп има витаминот C од лимонот, но уште позначајна е белката од јајцето, која прави матицата да несе зачудувачки.

Во зависност од регионот и состојбата на семејството, тешко е да се каже кога да се престане со ваквото стимулирање, но штом се забележи посакуваниот ефект и семејството почне бурно да се развива, тоа е знак за престанување со давањето на стимулативниот еликсир.

[dropcap]Н[/dropcap]а секој пчелар му е познато дека осите се големи штетници по пчеларникот и во одредени периоди од годината сериозно треба да се размислува за заштита на пчелите од нападите од оси. Осите, за разлика од пчелите, не произведуваат никаква храна и нивниот опстанок се базира на храната собрана од други инсекти или на храна прибрана при разни активности поврзани со шмукање и уништување на овошни плодови, лов на помали инсекти и многу други начини на грабеж.

Пчелите ги сметаат осите за непријатели и јаките пчелни семејства успешно се справуваат со осите кои пробуваат да украдат мед од кошницата. Но во сезони на голема наезда од оси или кај послаби пчелни семејства, потребна е интервенција и помош од пчеларот. А успешна заштита може да се направи само ако добро се познава противникот.

Осите градат живеалишта длабоко под земја, во стари ѕидови и шуплини од дрвја, места кои им пружаат идеална заштита и услови за развој. Саќето го градат едно врз друго, спротивно на пчелите кои градат паралелно. Осилото го градат од изџвакани целулозни влакна.

Едно семејство на оси се состои од исти членови како и едно пчелно семејство. Осите имаат своја матица, трутови и оси работнички, кои морфолошки лесно се идентификуваат. Матицата и трутовите се значително поголеми од осите работнички.

Осите слично како и пчелите, внимателно се грижат за своето потомство. При добар извор на храна, поради ваквата внимателна грижа, едно семејство на оси може да се развие во навистина голема заедница и да претставува сериозна закана за средината во која живее и за пчеларниците во непосредната околина. Така, едно силно семејство на оси може да има и повеќе од 10000 единки.

Затоа доколку на пчеларникот се појават голем број на оси, не се мали шансите во близина да има поголемо семејство на оси. Разните стапици, кои докажано и успешно функционираат, се само метод за смалување на бројот на осите. Единствениот начин да се спасат пчелите од ваквата наезда е да се пронајде осилото и на некој од добро познатите начини да се уништи.

[dropcap]Н[/dropcap]а ден 25.11.2014 година, во големата сала во објектот на Сојузот на стопански комори на Македонија, со почеток во 17:00 часот, ПЗ “Матица” – Скопје, ќе ја одржи четвртата едукативна средба. Средбата ќе биде искористена за запознавање на членовите на здружението со програма (софтвер) за електронско водење на пчеларникот, односно за водење на електронска евиденција за секое пчелно семејство.

[dropcap]П[/dropcap]родажбата на матичен млеч има голем удел во приходите остварени од продажба на пчелни производи за многу пчелари.  Но целиот процес на производство на матичен млеч бара многу посветеност, вештина, знаење и секако, неопходна апаратура. Токму таков апарат е оваа пумпа за собирање на матичен млеч, која значително ќе го олесни и забрза процесот на вадење на матичен млеч, а материјалите од кои е направена пумпата, ќе го сочуваат квалитетот на производот.

Пумпата е конструирана да работи на 220 V и на 12V, што се регулиира преку прекинувачот наменет за менување на режимот на работа. Сијаличката која служи како индикатор, дополнително помага да се утврди дали пумпата е вклучена во посакуваниот режим. Пумпата има способност да абсорбира до 15 литри во минута. Континуирано може да работи и до 5 часа. Кабелот долг 5 метри, на крајот има приклучок за приклучување на местото на запалката во автомобилот. Поседува и кабел со клеми, наменет за теренско вградување на восочни основи на рамките.

Садот за собирање на матичниот млеч е комплетно изработен од нерѓосувачки челик, а од инокс се направени и сите приклучоци на пумпата. Цревата се флексибилни и погодни за работа, а изработени се од пластика која се користи за изработка на садови во прехранбената индустрија.

Цената на оваа пумпа е нешто повеќе од 300 евра, а производителот дава гаранција од две години од денот на купување на пумпата.

[dropcap]Р[/dropcap]епродуктивниот и тренинг центар за пчеларство „Апицентар“, од 20-ти ноември 2014 година започна со примање на нарачки за матици и нуклеуси за 2015 година.

Цената на матиците од подвидот Apis mellifera macedonica е 800 денари. Матиците се обележани со плочка и содветен број со кој се следи педигрето. Матиците се спакувани во кафез за транспорт, поседуваат здравствено уверение, потврда за здравствената состојба и упаство за нејзино додавање и замена на старата матица со новата. 

Цената на нуклеусот е 2800 денари. Нуклеусите се составени е од 5 рамки (3 рамки легло, 2 рамки мед и полен), 1 кг пчела и селектирана матица од подвидот Apis mellifera macedonica (обележана со плочка и соодветен број со кој се следи педигрето), здравствено уверение, потврда за здравствена состојба и упаство за ослободување. Нуклеусите се спакувани во кутија со содветна вентилација при транспорт.

Нарачки можат да се извршат на официјалната интернет страна на „Апицентар“, а дистрибуцијата е по договор.

[dropcap]Н[/dropcap]а почетокот на третата едукативна средба на ПЗ „Матица“-Скопје, Организациониот одбор на манифестацијата „Денови на македонскиот мед -2014“ ги прогласи победниците во изборот за највкусен мед и изборот за најубавиот штанд на манифестацијата.

За највкусен мед за 2014 година беше избран медот на Влатко и Светлана Атанасоски од Прилеп. После органолептичкото испитување на медот и лабораториската анализа, комисијата за оценување на медовите и нивниот вкус, највеќе поени додели на семејството Атанасоски, второто место го освои мед од Штип, а дека прилепчани имаат убав мед покажува и освоеното трето место.

-Јас верувам дека сите македонски пчелари произведуваат вкусен мед и дека македонскиот мед е со голем квалитет. Сите кои учествуваа на манифестацијата ја заслужуваат оваа награда, но ете ја имав таа среќа нашиот мед да биде избран за највкусен. Ова е мотив за мене и моето семејство да се трудиме да го задржиме и подобриме квалитетот на нашиот мед-рече Влатко Атанасоски, освојувачот на првото место.

Влатко Атанасоски, го презентира својот мед на една од пчеларските манифестации во државава

Првото место за „најпчеларски“ штанд го освои штандот на Пчеларство Митревски од Скопје. При оценувањето во предвид се земени повеќе фактори како: услужливоста на изложувачите, декорацијата на штандот, асортиманот на производите и друго.

-Најзаслужни за оваа награда се мојата сопруга Марина и моето семејство, кои со многу трпение и вкус го уредија нашиот штанд-рече Марјан Митревски, добитник на наградата за најубав штанд.

Со право освоено прво место за најубав изложбен штанд-Марјан Митревски

На двајцата добитници на прво место, ќе им бидат доделени ваучери во вредност од 3000 денари за набавка на пчеларска опрема.

Во текот на наредната недела ќе бидат посетени и дечињата од неколку градинки во општина Центар, на кои ќе им бидат доделени награди за најдобра песничка, најдобра танцова точка и најдобар цртеж, поврзани со пчелите и медот. Наградата за сите категории ќе биде мед во висина од 2000 денари.

[dropcap]Н[/dropcap]а ден 20.11.2014 година, во големата сала во објектот на Сојузот на стопански комори на Македонија, со почеток во 17:00 часот, ПЗ “Матица” – Скопје, ќе одржи Трета едукативна средба, која ќе биде посветена на начинот на пчеларење на пчелар од Прилеп.
Во рамките на оваа едукативна средба, на пчеларот чиј начин на пчеларење ќе биде презентиран, ќе му биде доделена награда за највкусен мед од Државната манифестација-Денови на мед-Скопје 2014.

Мал тим на научници од неколку земји, го идентификува најстариот доказ за постоење на крлежите. Работејќи на парче килибар во кој се заробени мравка и крлеж прикачен на нејзината глава, утврдиле дека примерокот е стар повеќе од 50 милиони години.

Парчето килибар било пронајдено на Балтичкиот брег во Русија од еден археолог аматер. Бидејќи и крлежот и мравката се слеани во килибар, тешко е да се одреди дали крлежот паразитирал и се хранел со хемолимфата на мравката или само ја користел за транспорт. Без разлика на тоа, се смета дека ова претставува значаен доказ, кој покажува дека крлежите живееле поврзани со инсектите десетици милиони години наназад. Според научниците, ова е редок и можеби единствен примерок на фосил на крлеж, затоа што крлежите се многу ситни и обично по нивната смрт се изедени од разни инсекти. Се претпоставува дека во овој случај крлежот се прикачил на мравката која се заглавила во смола, па во обидот да се извлече, во смесата од смола го вовлекла и крлежот. Подоцна смолата се исушила, стврднала и целосно ги фосилизирала.

Фосилизираниот крлеж е во сродство со денешните крлежи кои паразитираат кај пчелите, па овој вреден археолошки пронајдок може да послужи за проучување на нивното постоење, нивната еволуција, влијание врз екологијата и биодиверзитетот и др.

[dropcap]З[/dropcap]а пчеларот одсекогаш било предизвик да се надмудрува со пчелните роеви. Тој се обидува да размислува како пчелите во ројот, да го предвиди секој нивни потег и на крај да излезе како победник. Според многу пчелари, фаќањето роеви е како рибарењето. Без добра локација и без добар мамец, нема успех во ловот. Локациите посетувани од роевите, помалку или повеќе им се познати на пчеларите, но што е со мамците?

Постојат многу комерцијализирани синтетички мамци за роеви, кои според некои пчелари функционираат одлично, а според некои не. Еве неколку рецепти за домашна изработка на мамци за роеви:

Мамец-паста со етерично масло

1/4 шоља со маслиново масло, пола табла восочна основа и 20 капки на етерично масло од лимонова трева (Cymbopogon, го има по аптеки) се ставаат заедно да се растопат. Обично се ставаат во друг сад со вода која врие. Кога состојките ќе се растопат и добро ќе се измешаат, добиената смеса се става во садови од алуминиумска фолија или стаклени теглички. Мамецот има интензивен мирис на лимон, кој ги привлекува пчелите, а се користи во доза од една мала лажичка или се сече на мали коцки. Пастата се става на рамконосачите, на подницата на кошницата или со неа се премачкуваат ѕидовите од кошницата. Поголем ефект ќе има ако се користи кошница со постаро саќе.

Феромонски сок од матици

При замената на истрошените и стари матици со нови, наместо да ги убиете, пуштете ги во тегла и прелијте ги со шпиритус, ацетон, или некој појак алкохол и ставете ги во ладилник. Матиците ќе угинат, а додадениот растворувач ќе ги извлече и ќе ги зачува сите нивни феромони. Не се препорачува гмечење на матиците, затоа што на тој начин може да се изгуби дел од феромоните. Ваквиот феромонски сок ги содржи мандибуларниот феромон на матицата (QMP), одговорен за роењето, феромонот со кој матицата ги привлекува и принудува пчелите од семејството да ја следат (QRP) и тарзалниот феромон, кој им укажува на пчелите за присуство на матицата и има влијание врз роевиот нагон. Ваквиот мамец по потреба се вади од ладилник, со памукче се натопува од него, памукчето се става во мала вакуумска кесичка продупчена на повеќе места. Ваквата кесичка се става во празна кошница или нуклеус на соодветна локација. Феромонскиот сок функционира на принципот на парфем-алкохолот испарува, а мирисот на матицата останува одредено време.

Синтетички феромонски мамец

Составот на комерцијалните мамци за роеви е цитрал, гераниол и геранијска киселина. Измешајте ги овие состојки во однос 1:1:1 и ќе добиете синтетички Насонов феромон. Поради цената на состојките кои влегуваат во составот, овој мамец не претставува голем предизвик за приготвување од страна на пчеларите.

[dropcap]Н[/dropcap]ашата држава е една од малкуте земји во светот, кои можат да се пофалат со целосна територијална покриеност од локален и автохтон подвид на пчели. Македонската медоносна пчела (Apis mellifera macedonica), освен на целата површина на Македонија, ја има и во северна Грција, делови од Бугарија, дел од Србија, Украина и Романија. Детерминирана е од Фридрих Рутнер, кој во 1988 година ја определил територијалната распространетост на овој подвид и покажал дека A.m.macedonica јасно се разликува од грчката (A.m.cecropia), крањската (A.m.carnica) и останатите европски подвидови на медоносни пчели. Во тоа време бугарските и романските пчеларски научници не можеле да се помират и да ја прифатат оваа одлука на Рутнер, сметајќи дека тие имаат свој подвид на пчели. Така Бугарите македонската пчела ја именувале A.m.rodopica, а Романците A.m.carpatica. Денес, називот A.m.macedonica е прифатен и за нивните автохтони пчели, па овие принудни називи скоро и да не се користат.

Уште пред повеќе од 2000 години, Аристотел забележал дека посветлата пчела (македоника) е поблагородна, повитална и помирна од потемната локална пчела (секропија). Многу години подоцна во Р. Македонија, експериментот на групата COLOSS го потврдил тврдењето на Аристотел. Докажано е дека оваа пчела има слаба до умерена одбранбена способност и дека при работа со неа понекогаш е потребна пчеларска капа. Се смета дека мирниот темперамент е поради блиската роднинска врска на македонската и крањската пчела.

Морфолошки, невозможно е да се забележи разлика помеѓу крањската и македонската пчела. Единствено, понекогаш жолтата пегавост на стомачните прстенчиња може да посочува на разлика помеѓу подвидовите, но тоа не може да се смета како релевантен споредбен фактор. Нема некоја поголема разлика во бојата кај пчелите работнички, трутовите и матиците, па понекогаш претставува проблем да се најде матицата доколку таа не е обележана. Телото на македонската пчела е прекриено со кратки и задебелени влакненца. Крилцата се куси, нозете се долги, трупот е тенок и релативно долг, со просечна должина од 6,5 mm. Има добро развиено јазиче, пчелите се добри летачи и можат да летаат по храна на поголема оддалеченост, поради што се сметаат за вредни и добри работници. Трутовите се нешто помали од оние кај крањската пчела.

Имаат тенденција кон роење, при што ја искористуваат првата прилика пружена од пчеларот, за да се изројат. Во фазата на роидбен нагон, градат неверојатно многу матичници. Се смета дека причината за изразениот роидбен нагон е тоа што со векови наназад се одгледувале во просторно ограничените традиционални плетени трмки или кошари. Македонската пчела собира големи количини на прополис, што ја прави одлична за пчеларите насочени кон производство на овој пчелин производ, но изразеноста на оваа особина понекогаш ја отежнува работата во кошницата поради прополизираните и споени рамки и делови од кошницата. Со медобер почнува уште во рана пролет и произведува специфичен мед за овој подвид, со посебен и уникатен квалитет. Просечната медопродукција засега изнесува 17 кг. Ретко покажува афинитет кон грабеж. Македонската пчела е доста економична. Во текот на презимувањето, според мерењата на Доц. Д-р Узунов, троши околу 8 кг храна, односно околу 50 грама мед дневно. Лесно презимува и почнува со развој многу рано. Леглото е доста компактно. Отпорна е на болести на леглото, а испитувањата правени во Англија, Германија и Австрија во региони со висока заразеност на ноземоза, покажале дека македонската пчела добро презимува и покажува изразена отпорност кон ноземата.

Моментно, во државава постојат неколку здруженија и институции кои работат на испитување, конзервирање и подобрување на македонската пчела. Истите со гордост ја промовираат и прават обиди за нејзина популаризација низ светот, затоа што да се има ваков автохтон генетски потенцијал, воопшто не е мала и незначајна работа.